Տիկին Հռիփսիկ

չորս տարեկան էր

երբ մայրը

անվերադարձ մեկնեցաւ

այլեւս մեծ ես`

իրեն ըսին

ու մէջքին գոգնոց մը

սեղմ կապեցին

չորս տարեկան էր

մէջքին գոգնոցը սեղմ կապած

փոքրիկ սնտուկին վրայ բարձրացաւ

որպէս խոհանոց ծառայող

գուռին հասաւ

ու աման լուալու սկսաւ

չորս տարեկան էր

աշխատելու սկսաւ

ու ամբողջ կեանք մը

անխոնջ աշխատեցաւ

մինչեւ որ

օրին մէկը

սպառած

քակեց գոգնոցը

փոքրիկ սնտուկին մէջ մտաւ

կծկուեցաւ

ու մօրը կողքին

հանգչեցաւ